Gaurkoan, bost astez gure gelan praktikak egiten egon den Manex Torrealdairi egin diogu elkarrizketa.
1.
Zergatik aukeratu duzu irakasle izatea?
Lanbide bat
aukeratzerako garaian beti egoten dira duda asko, bat aukeratu, beste bat
aukeratu… nire kasuan informatikarekin eta irakaskuntzarekin eduki nituen
dudak. Lehenik informatika egitea erabaki nuen baina irakaskuntzari ez nizkion
ateak itxi nahi. Aisialdiko begirale moduan lanean hasi nintzenean konturatu
nintzen nahiago nuela irakasle izan informatiko baino, nire etorkizuna haurrei
irakasten igaro nahi nuela eta ez ordenagailu baten aurrean. Orduan hasi
nintzen irakaskuntza ikasten.
2.
Zergatik etorri zinen Orioko ikastolara? Zergatik LH5era?
Usurbilgo ikastola aski
ezaguna dut jada, bertan ikasi nuen eta urte ugari pasa ditut han. Aldaketa
nahi nuen. Oriok herri bezala Usurbilen antz handia du, bai herri giro aldetik,
bai jende aldetik eta baita ikastolan ere. Horregatik erabaki nuen hona
etortzea, banekien jende jatorra egongo zela eta gustura egongo nintzela 5 aste
hauek.
LH5 mailan praktikak egitea ez zen nire aukera izan,
baina esan zidatenean oso gustura jarri nintzen. Adin polita da, 10 urte,
haurretik gaztetxora pasatzen hasten baitira. Oso gustura nago praktikak talde
honekin egin izanaz, asko ikasi dut eta asko irakatsi izana espero dut.
3.
Zer iruditu zaizu Orio? Alde positiboa eta negatiboa. Zer desberdintasun
dago Usurbilekin?
Oso polita! Kosta giroa
ezagutzea esperientzia ederra izan da niretzat. Bertan bizi zaretenok
itsasontzian ibaitik itsasoratzen ikustea gauza normala da baina niretzat
horrelako detaile txiki bat gauza berezi bat izan da. Usurbilek kostarik ez
duenez ez daude kostan ohikoak diren hainbat gauza eta aldaketa kuriosoa izan
da niretzat.
Alde negatiboa jartzeko asko pentsatu beharra daukat, ez
dut inolako kexarik eta hobetzeko zerbait esatea zaila egiten zait.
Bi herrietan, paisaia kontuan eduki gabe, ikusi dudan
desberdintasunik handiena herriko eragile desberdinen arteko lotura da.
Adibidez, Txurrumuski eta Ikastolaren artean dagoen harremana oso ona iruditu
zait. Hezkuntza formala eta ez formala uztartzeko laguntza handia ematen duela
uste dut bien arteko harreman horrek.
4.
Zergatik ari zara egiten ikasketak Euskal Herrian?
Txikitatik hazi eta hezi
naiz euskal giro batean eta nire ikasketa guztiak egin ditut euskaraz;
horregatik jarraitu nahi nuen euskaraz ikasten. Gainera, gerora irakaskuntzan
lan egiten badut euskaraz irakatsi nahi dut eta horretarako hoberena euskaraz
ikastea dela iruditzen zait.
5.
Zer irakatsi nahi duzu? Tutore, Musika, Soinketa, Berezia…
Duda asko ditut honen
inguruan. Musika eta heziketa berezia asko gustatzen zaizkidan arren praktika
hauetan tutore izateak duen lana ikusi dut eta oso interesgarria iruditu zait.
Ikasgelatik at ere, tutoreak, lan handia duela ikusi dut eta kanpoko lan horrek
eragin positiboa duela haurrengan iruditzen zait.
6.
Nolakoa izan zen zure bizitza Usurbilgo ikastolan?
Ez dut askorik
gogoratzen garai hauetaz baina gogoratzen dudanagatik oso urte lasaiak ziren,
ez genuen etxeko lan askorik edukitzen eta ikasten genuena nahiko erraza egiten
zitzaidan. Arratsaldeak jolasten pasatzen genituen, football-ean, eskubaloian,
kaleko jolasetan…
7.
Zeintzuk dira zure zaletasunak?
Nire zaletasunik
handienetako bat kirola da. Asko gustatzen zait kirola egitea, korrika,
bizikleta, igeriketa, mendia, eskubaloia, eskia, snowa…
Kirolaz gain trikitixa jotzea ere oso gustuko dut eta
udara honetan gitarra ikasten hasi naiz.
Bestalde aisialdi munduan ere ordu asko pasatzen ditut.
Ziortza gazte elkartean (Usurbileko aisialdi taldea) ibiltzen naiz eta
Usurbilgo gaztetxoekin esperientzia polit eta bizipen ugari eduki ditut eta
horrela jarraitzea espero dut urte batzuetan. Mundu honek begirale lagun asko
egiten eta, niri, nire burua hobeto ezagutzen lagundu dit.
Motxean
Herri bat: Tolosa
Janari bat: Entsalada
Kolore bat: Berdea
Hondartza ala
mendia: Mendia
Kirol bat: Triatloia
Musika tresna
bat: Trikitixa
Garraiobide bat: Bizikleta
Animalia bat: Txakurra
Musika talde bat: Kerobia
Pirsinga ala
tatuajea: Pirsinga
Neska laguna ala
mutil laguna: Neska lagun jator bat
Telebista
programa bat: “Como conocí a vuestra madre”
